फोटो ग्यालरी

मिति २०७८ माघ २८ गते महालक्ष्मी नगरपालिका वडा नं ७ को नव निर्मित वडा कार्यालय भवनको आजको कार्यक्रमका प्रमुख अतिथि बागमति प्रदेश सरकारका मुख्य मन्त्री माननिय राजेन्द्रप्रसाद पाण्डेज्यूद्वारा उद्घाटन गरिएको छ । उक्त उद्घाटन कार्यक्रममा प्रतिनिधि सभा सदस्य मा. कृष्णलाल महर्जनज्यू र बागमती प्रदेशसभा सदस्य एवम् प्रदेश मामिला समितिका सभापति मा. माधव प्रसाद पौडेलज्यू, नगर प्रमुख श्री रामेश्वर श्रेष्ठज्यू र नगर उपप्रमुख श्री निर्मला थापाज्यूको आतिथ्यता र वडा नं ७ का वडा अध्यक्ष श्री नकुल थापाको अध्यक्षता रहेको थियो । त्यसैगरी महालक्ष्मी नगरपालिकाका प्रमुख प्रशासकीय अधिकृत श्री रोशन ज्ञवाली, वडा नं १, ४ र ६ का वडा अध्यक्षज्यूहरूसहित नगर कार्यपालिका सदस्यहरू, वडा सदस्यहरू, स्थानीय बुद्धिजिवी तथा समाजसेवीहरूका साथै सुरक्षाकर्मी र नगरपालिकाका कर्मचारीहरूको उपस्थिति रहेको थियो । कार्यक्रमका प्रमुख अतिथि बागमती प्रदेशका मुख्य मन्त्री मा. राजेन्द्रप्रसाद पाण्डेज्यूले शुभकामना मन्तव्य राख्नुभएको थियो । वहाँले नयाँ वडा भवन निर्माणका लागि २९.३ वर्ग मिटर थप जग्गा दान गर्नुहुने समाजसेवी तथा वडा नं ७ का वडा सदस्य श्री दामोदर प्रसाद पौडेलज्यूको प्रशंसा समेत गर्नु भयो । उक्त कार्यक्रममा वडा नं ७ को नव निर्मित वडा कार्यालय भवनका लागि जग्गा दान दिनुहुने समाजसेवी दामोदर प्रसाद पौडेल, सो भवन निर्माण कमिटि र अनुगमन कमिटिका पदाधिकारीहरू, वडाका कर्मचारी र समग्र वडा विकासमा निरन्तर सहयोग गर्नुहुने समाजसेवीहरूलाई सम्मान गरिएको थियो ।

कार्यक्रममा नगर प्रमुख श्री रामेश्वर श्रेष्ठज्यूले नगरपालिकाबाट हालसम्म शिक्षा, स्वास्थ्य, पूर्वाधार विकास, खानेपानी, कृषि, पर्यटन, श्रम तथा रोजगार, यातायातलगायतका अन्य क्षेत्रहरूमा गरिएका मुख्य मुख्य उपलब्धीहरू बारे बताउनुभयो । उक्त कार्यक्रका विशेष अतिथिहरूसहित नगर उपप्रमुख श्री निर्मला थापाज्यूले शुभकामान मन्तव्य राख्नु भएको थियो । कार्यक्रममा वडा नं ७ का वडा सदस्य एवं नगर कार्यपालिका सदस्य श्री रेस्मा के.सी कार्कीले स्वागत मन्तव्य राख्नुभएको थियो । वडा कार्यालय भवन उद्घाटन कार्यक्रमको अध्यक्षता गर्नुहुने वडा नं ७ का वडा अध्यक्ष श्री नकुल थापाले सो भवन निर्माणमा सहयोग, सहकार्य तथा योगदान गर्नुहुने सम्पूर्णमा आभार व्यक्त गर्नुभयो ।

मिति २०७८ कात्तिक १६ गते महालक्ष्मी नगरपालिका ललितपुरको आयोजना र श्री महालक्ष्मी मा. वि.को व्यवस्थापनमा “नगरस्तरीय खुल्ला कविता प्रतियोगिता (माध्यमिक तह)” सम्पन्न भयो । उक्त कार्यक्रममा नगर प्रमुख श्री रामेश्वर श्रेष्ठज्यूको प्रमुख आतिथ्यता, नगर उपप्रमुख श्री निर्मला थापाज्यूको विशेष आतिथ्यता, प्रमुख प्रशासकीय अधिकृत श्री पुरुषोत्तम सापकोटा, वडा नं ८ र ९ का वडा अध्यक्षज्यूहरू, कार्यपालिका सदस्यहरू, नगर शिक्षा समिति सदस्यहरू, महालक्ष्मी मा.वि. का वि.व्य.स. अध्यक्ष, नगरभित्रका शैक्षिक संघ-संघठनका पदाधिकारीहरूको आतिथ्यता र सहभागी विद्यालयका प्र.अ तथा प्रतिनिधि शिक्षकहरूको उपस्थिति रहेको थियो भने कार्यक्रमको अध्यक्षता प्रमुख शिक्षा अधिकृत श्री चिरञ्जीवी पौडेलले गर्नु भएको थियो ।

मुकुन्दप्रसाद पोखरेल निर्णायक मण्डल संयोजक र पूर्णानन्द ओझा र उर्मिला ढकाल निर्णायक मण्डल सदस्य रहनुभएको उक्त प्रतियोगितामा २० विद्यालयहरूबाट जम्मा ३७ जना विद्यार्थीहरूको सहभागिता रहेको थियो । यस नगरस्तरीय खुल्ला कविता प्रतियोगिताका विजेताहरू निम्नानुसार रहेका छन् ।

प्रथमा - सुमिना विष्ट (हेरिटेज इ.बो. स्कुल), शीर्षकः बुद्धको खोजी

द्वितीय - अर्पण घिमिरे (महालक्ष्मी एकेडेमी), शीर्षकः द्रोणाचार्यले कमण्डलु बोकेको देखे

तृतीय - शुभम् कार्की (पिसपोइन्ट एकेडेमी), शीर्षकः कुरा बुझौँ साँचो

सान्त्वना - आशिका घिमिरे (सिस्नेरी मा.वि), शीर्षकः तिमी र धर्ती

प्रतियोगिताका विजेताहरूलाई नगर प्रमुखज्यूले नगद पुरस्कार र प्रमाणपत्र हस्तान्तरण गर्नुभयो भने प्रमुख प्रशासकीय अधिकृत, प्रमुख शिक्षा अधिकृत, वडा अध्यक्षहरू र कार्यपालिका सदस्यहरूले विजेता र सहभागी विद्यार्थीहरूलाई सम्मान तथा प्रमाण पत्र वितरण गर्नु भएको थियो ।

नगर प्रमुखज्यूले विद्यार्थीको सर्वाङ्गीण विकासका लागि नगरपालिकाबाट आयोजित यस प्रकारका प्रतियोगिताहरूले सहयोग पुर्याउने विश्वास व्यक्त गर्नुभयो । उहाँले कोभिड-१९ को महामारीको समयमा वैकल्पिक माध्यमबाट शिक्षण सिकाइलाई प्रभावशाली ढङ्गले निरन्तरता दिइएकोमा विद्यार्थी, शिक्षक र विद्यालयहरूप्रति आभार व्यक्त गर्नुभयो । उहाँले प्रतियोगिताका विजेताहरूलाई बधाई एवम् शुभकामना दिनुका साथै प्रतियोगिताका सहभागी सम्पूर्ण विद्यार्थीहरूको प्रशंसा गर्नुभयो । साथै प्रतियोगिताका निर्णायक मण्डलका संयोजक र सदस्यहरू र प्रतियोगिता व्यवस्थापन गर्नुहुने श्री महालक्ष्मी मा.वि परिवारलाई नगर प्रमुखज्यूले मायाको चिनो र प्रशंसा पत्र प्रदान गर्नुभयो ।

३१ औं अन्तर्राष्ट्रिय जेष्ठ नागरिक दिवसको अवसरमा “बा आमाको सेवा, स्वास्थ्य उपचारमा टेवा” भन्ने नाराका साथ आज मिति २०७८ असोज १४ गते नगर प्रमुख श्री रामेश्वर श्रेष्ठज्यूको अध्यक्षतामा “ज्येष्ठ नागरिक सम्मान तथा स्वास्थ्य सेवा शुभारम्भ कार्यक्रम” सम्पन्न भयो । उपस्थित ज्येष्ठ नागरिकमध्ये सबैभन्दा ज्येष्ठ श्री हेमकुमारी विष्टको विशेष आतिथ्यता रहेको उक्त कार्यक्रममा नगर उपप्रमुख श्री निर्मला थापाज्यू, प्रमुख प्रशासकीय अधिकृत पुरुषोत्तम सापकोटा, वडा नं १, २, ३, ५, ६, ८ र ९ का वडा अध्यक्षहरू, कार्यपालिका सदस्य र नगरसभा सदस्यहरू, प्रमुख शिक्षा अधिकृत चिरञ्जीवी पौडेलसहित नगरपालिकाका कर्मचारी र स्वास्थ्यकर्मीहरूको उपस्थिति रहेको थियो । कार्यक्रमको सञ्चालन वडा नं १ का वडा अध्यक्ष श्री नन्द कुमार न्यौपानेले गर्नु भएको थियो । आजको कार्यक्रममा १० वटै वडाका २ जना ज्येष्ठ पुरुष र २ जना ज्येष्ठ महिला गरी ४० जना ज्येष्ठ नागरिकहरूको मेडिकल अधिकृतको नेतृत्वमा स्वास्थ्यकर्मीहरूबाट रक्तचाप, मधुमेह, नाडीको गति, अक्सिजन लेभल लगाएतका सामान्य स्वास्थ्य परीक्षण पश्चात आवश्यक औषधी वितरण गरी ज्येष्ठ नगारिक स्वास्थ्य सेवा कार्यक्रमको शुभारम्भ गरियो । कार्यक्रममा उपस्थित ज्येष्ठ नागरिकहरूलाई खादा र कम्वल वितरण गरी नगर प्रमुखज्यू र उपप्रमुखज्यूबाट सम्मान गरिएको थियो ।

कार्यक्रममा नगर प्रमुख श्री रामेश्वर श्रेष्ठज्यूले "बा आमाको सेवा, स्वास्थ्य उपचारमा टेवा" भन्ने नाराका साथ ७० वर्ष नाघेका जेष्ठ नागरिकहरुका लागि प्रत्येक महिना घरदैलोमै गई रक्तचाप, मधुमेह, अक्सिजनको मात्रा जस्ता सामान्य स्वास्थ्य परीक्षण गरी आवश्यक औषधि वितरण गरिने भन्ने महालक्ष्मी नगरपालिका ललितपुरको आर्थिक वर्ष २०७८/०७९ को नीति तथा कार्यक्रम बमोजिम ज्येष्ठ नागरिक स्वास्थ्य सेवा कार्यक्रम आजबाट शुभारम्भ भएको घोषणा गर्नुभयो । उहाँले ज्येष्ठ नागरिक समाजको आदरणीय अङ्ग हुनुभएकाले उहाँहरूप्रति सधै सबैले उच्च सम्मान प्रकट गर्नुपर्नेमा जोड दिनुभयो र नगरका सबै ज्येष्ठ नागरिकको प्रतिनिधित्व गर्दै कार्यक्रममा उपस्थित हुनुहुने सम्पूर्ण ज्येष्ठ नागरिकहरूप्रति हार्दिक कृतज्ञता प्रकट गर्नुका साथै उहाँहरूको दिर्घायु र सुस्वास्थ्यको कामना गर्नुभयो ।

त्यसैगरी कार्यक्रममा नगर उप्रमुख श्री निर्माला थापाज्यू, सबै वडा अध्यक्षहरूको प्रतिनिधित्व गर्दै वडा नं ९ का वडा अध्यक्ष श्री वासुदेव शर्मा गौतमले शुभकामना मन्तब्य राख्नुभयो भने कार्यक्रमको मर्म र उद्देश्यमाथि प्रमुख प्रशासकीय अधिकृत श्री पुरुषोत्तम सापकोटाले प्रकाश पार्नुभयो । यससँगै ज्येष्ठ नागरिक स्वास्थ्य सेवा अन्तर्गत नगरका प्रत्येक ज्येष्ठ नागरिकहरूको हरेक महिना घरदैलोमै गई रक्तचाप, मधुमेह, अक्सिजनको मात्रा जस्ता सामान्य स्वास्थ्य परीक्षण गरी आवश्यक औषधि वितरण गर्ने गरी महालक्ष्मी नगरपालिकाको नियमित स्वास्थ्य सेवाका रूपमा सञ्चालन गरिनेछ ।

यस महालक्ष्मी नगरपालिका ललितपुरको आयोजनामा मिति २०७८ असोज ११ र १२ गते वडा नं ८ र ९ का सहकारीहरूका लागि २ दिने “सहकारी तथा गरिबी सम्बन्धी व्यवस्थापन सूचना प्रणाली (COPOMIS) तालिम” नगर प्रमुख श्री रामेश्वर श्रेष्ठज्यूको अध्यक्षतामा वडा नं ९ स्थित ब्रह्मपुरी बचत तथा ऋण सहकारीको सभाहलमा सम्पन्न भयो । उक्त कार्यक्रममा नगर उपप्रमुख श्री निर्मला थापाज्यू, प्रमुख प्रशासकीय अधिकृत श्री पुरुषोत्तम सापकोटा, प्रमुख शिक्षा अधिकृत श्री चिरञ्जीवी पौडेल, वडा नं ९ का वडा अध्यक्ष श्री वासुदेव शर्मा गौतम, ब्रह्मपुरी बचत तथा ऋण सहकारीका अध्यक्ष रामशरण घिमिरेको उपस्थिति रहेको थियो । वडा नं ८ र ९ का १९ वटा सहकारी संस्थाहरुका प्रतिनिधिहरू सहभागी रहेका उक्त कार्यक्रमको सञ्चालन सहकारी शाखा प्रमुख सरीता गौतमले गर्नुभएको थियो भने सहकारी विभागबाट योगमनी पाण्डे र सुजीता ढकालले सहभागीहरूलाई COPOMIS सम्बन्धी प्रशिक्षण गर्नु भएको थियो ।

मिति २०७८ भाद्र २२ गते निजामती सेवा दिवसको शुभ अवसरमा यस महालक्ष्मी नगरपालिका नगर कार्यपालिकाको कार्यालयमा सेवा लिन आउने पहिलो सेवाग्राही महालक्ष्मी न.पा. वडा नं ८ बस्नुहुने श्री नारायण मिजारलाई प्रमुख प्रशासकीय अधिकृत श्री पुरुषोत्तम सापकोटाले ढाका टोपी र खादा लगाई कार्यालयमा स्वागत गरी कार्यालयको नियमित सेवा सुभारम्भ गर्नुभयो । उक्त कार्यक्रममा प्रमुख शिक्षा अधिकृत श्री चिरञ्जीवी पौडेल लगायतका शाखा प्रमुख एवम् अन्य कर्मचारीहरूको उपस्थिति रहेको थियो । प्रमुख प्रशासकीय अधिकृत श्री पुरुषोत्तम सापकोटाले “व्यावसायिक र सिर्जनशील प्रशासनः विकास, समृद्धि र सुशासन” भन्ने यस वर्षको निजामति सेवा दिवसको नारालाई आत्मीकरण गर्दै सेवामा तत्परता र विनम्रतालाई अवलम्बन गर्ने सबै कर्मचारीको तर्फबाट प्रतिबद्धता व्यक्त गर्नुभयो ।

मिति २०७८ भाद्र १२ गते महालक्ष्मी नगरपालिका वडा नं ९ स्थित श्री सिस्नेरी माध्यमिक विद्यालयमा नगर प्रमुख श्री रामेश्वर श्रेष्ठज्यूको प्रमुख आतिथ्यता र सो विद्यालयका वि. व्य. स. अध्यक्ष श्री मोहन तण्डुकारको अध्यक्षता र प्रमुख प्रशासकीय अधिकृत श्री पुरुषोत्तम सापकोटा, वडा नं ९ का वडा अध्यक्ष श्री वासुदेव शर्मा गौतम, शिक्षा शाखा प्रमुख श्री चिरञ्जीवी पौडेल, विद्यालयका प्रअ श्री चेतनाथ पन्त, नगरपालिकाका इन्जिनियरहरू, विद्यालयका शिक्षक र अभिभावकहरू सहित समाजसेवी बुद्धिजीवीहरूको उपस्थितिमा "नव निर्मित कक्षाकोठा र राष्ट्रपति शैक्षिक सुधार कार्यक्रम अन्तरगतका ICT शैक्षिक सामग्री हस्तान्तरण" कार्यक्रम सम्पन्न भयो।

कार्यक्रममा सम्बोधन गर्नुहुँदै नगर प्रमुखज्यूले नगरपालिकाले शिक्षा क्षेत्रको विकास, शैक्षिक गुणस्तरमा अभिबृद्धि, शिक्षामा नवीनतम् प्रविधिको विकास, विद्यालयहरूलाई बालमैत्री र अपाङ्गमैत्री बनाउदै नगरलाई नै शैक्षिक हबका रुपमा विस्तार गर्ने लक्ष्य बमोजिम नै नगरपालिकाले गर्दै आएका र भावी दिनमा गर्ने कार्यहरू माथि प्रकाश पार्नुभयो। उहाँले परम्परागत शैलीको शिक्षण सिकाइलाई सहभागितामूलक र प्रयोगात्मक शिक्षण सिकाइसहितको जीवन उपयोगी शिक्षामा रूपान्तरण गर्नुका साथै नवीनतम् सूचना प्रविधिको प्रयोग गरी डिजिटल क्लासरूमको अवधारणा अनुसारका कक्षाकोठा र विद्यालय व्यवस्थापनमा नगरपालिकाले प्राथमिकताका साथ कार्यक्रमहरू सञ्चालन गर्दै आएको बताउनुभयो। उहाँले नव निर्मित कक्षाकोठा र हस्तान्तरण गरिएका शैक्षिक सामग्रीले विद्यालयको शैक्षिक गुणस्तर वृद्धिमा मद्दत पुग्ने विश्वास व्यक्त गर्नुभयो।

सोही कार्यक्रममा प्रमुख प्रशासकीय अधिकृत, शिक्षा शाखा प्रमुख, वडा नं ९ का अध्यक्षले शुभकामना मन्तव्य राख्नुभएको थियो। वि. व्य. स. अध्यक्षले विद्यालयको भौतिक पूर्वाधार विकास र शैक्षिक गुणस्तर अभिवृद्धिलाई प्राथमिकता साथ अघि बढाइएको बताउनुभयो। त्यसै गरी विद्यालयका प्रधानाध्यापकले विद्यालयको हालसम्मको गतिविधि र भावी योजना बारे सबै माझ जानकारी गराउनुभयो।

मिति २०७८ भाद्र ०८ गते खाद्य हरियाली शहर कार्यक्रम अन्तर्गत वृक्षारोपण कार्यक्रम नगर प्रमुख श्री रामेश्वर श्रेष्ठज्यूको अध्यक्षतामा र NAST का उपकुलपति डा. सुनिलवावु श्रेष्ठको विशेष आतिथ्यतामा म.न.पा-८ स्थित श्री विश्वामित्र गणेश मा.वि. परिसर र वडा नं ८ को सामुदायिक वनमा सम्पन्न भयो । उक्त कार्यक्रममा प्रमुख प्रशासकीय अधिकृत श्री पुरुषोत्तम सापकोटा, वडा नं ८ का वडा अध्यक्ष श्री विश्वराज श्रेष्ठ, NAST का सचिव डा. महेश अधिकारी, वरिष्ठ वैज्ञानिक डा. कान्ति श्रेष्ठलगायत नाष्टका प्रतिनिधिहरु, विश्वामित्र गणेश मा.वि वि.व्य.स.का अध्यक्ष, प्रधानाध्यापक, सामुदायिक वनका अध्यक्ष, नगरपालिकाका कृषि शाखा प्रमुख सहितका कर्मचारी तथा स्थानीय समाजसेवी तथा बुद्धिजिवीहरूको उपस्थिति रहेको थियो । वृक्षारोपणका क्रममा खाद्य सुरक्षालाई टेवा पुर्याउने फलफूलका विरूवाहरू अम्बा, सुन्तला, कागती, एभोकाडो, केरा र नास्पाति लगायतका विरूवा रोपिएको थियो ।

कार्यक्रममा सम्बोधन गर्नुहुँ‍दै नगर प्रमुख श्री रामेश्वर श्रेष्ठज्यूले NAST र महालक्ष्मी नगरपालिकाबीच २०७७ फाल्गुन १३ मा खाद्य हरियाली शहर परियोजना सम्बन्धी समझदारी गरिनुको मुख्य उद्देश्यहरू, हालसम्म भएका कार्यहरू र आगामी दिनमा हुने कार्यक्रमहरूमाथि प्रकाश पार्नुभयो । उहाँले नगरभित्रका हरेक घरमा कम्तिमा दुई वटा वृक्ष रोपिनुपर्ने र त्यस मध्ये कम्तिमा एक फलको वृक्ष हुनुपर्नेमा जोड दिनुभयो । त्यसैगरी, कार्यक्रममा नाष्टका तर्फबाट डा. सुनिलबाबु श्रेष्ठले कार्यक्रमको सफलताको कामना सहितको मन्तब्य राख्नु भएको थियो ।

मिति २०७८ भाद्र १ गते यस महालक्ष्मी नगरपालिकाका नगर प्रमुख श्री रामेश्वर श्रेष्ठज्यूको अध्यक्षता, नगर उपप्रमुख श्री निर्मला थापाज्यू, प्रमुख प्रशासकीय अधिकृत श्री पुरुषोत्तम सापकोटा, वडा नं १, २, ३ र ९ का वडा अध्यक्षज्यूहरू, सशस्त्र प्रहरी निरीक्षक, इमाडोल र लुभु महानगरीय प्रहरी प्रभागका प्रमुख र ललितपुर महानगरपालिकाका नगर प्रहरीका प्रमुख लगायत नगरपालिकाका कर्मचारीहरूको उपस्थितिमा नव नियुक्त नगर प्रहरीहरूका लागि ३० दिने आधारभूत तालिमको शुभारम्भ कार्यक्रम वडा नं ९ स्थित सुभतारा स्कुलमा सम्पन्न भयो । कार्यक्रममा सम्बोधन गर्नुहुँदै नगर प्रमुख श्री रामेश्वर श्रेष्ठज्यूले नव नियुक्त नगर प्रहरीहरूलाई शुभकामना दिनुहुँदै यस तालिमबाट कर्तब्यनिष्ठ र अनुशासित भई शिष्टाचारसहित सदैव नगरवासीहरूको सेवामा अहोरात्र खट्न सक्ने क्षमता विकास हुने विश्वास व्यक्त गर्नुभयो ।

सो कार्यक्रममा नगर उपप्रमुख श्री निर्मला थापाज्यू, प्रमुख प्रशासकीय अधिकृत श्री पुरुषोत्तम सापकोटा र वडा नंं ९ का वडा अध्यक्ष श्री वासुदेव शर्मा गौतमले शुभकामना मन्तव्य राख्नुभएको थियो भने शिक्षा शाखा प्रमुख श्री चिरञ्जीवी पौडेलले कार्यक्रम सञ्चालन गर्नुभएको थियो ।

आज मिति २०७८/०३/०८ गते महालक्ष्मी नगपालिका ललितपुरको दसौं नगरसभाको सुभारम्भ भयो । आज बसेको नगरसभाको बैठकमा नगर प्रमुख श्री रामेश्वर श्रेष्ठज्यूबाट पेस भएको आर्थिक वर्ष २०७८/७९ को नीति तथा कार्यक्रम सभाबाट सर्वसम्मतिले पारित भएको छ । त्यसैगरी आजै उपप्रमुख श्री निर्मला थापाज्यूले आर्थिक वर्ष २०७८/७९ को वार्षिक राजश्व तथा व्ययको अनुमान (बजेट) र न्यायिक समितिको प्रतिवेदन २०७८ सभा समक्ष पेस गर्नु भएको छ । त्यसैगरी सभा सदस्य श्री लक्ष्मण रोक्काज्यूले आर्थिक विधेयक २०७८ सभा समक्ष पेस गर्नु भएको छ । सभाको आगामी बैठक मिति २०७८ असार १० गते ११ बजे बस्ने गरी बोलाइएको छ ।

आजको बैठकमा बागमती प्रदेशका प्रदेश मामिला समितिका सभापति एवम् प्रदेश सभा सदस्य मा. माधवप्रसाद पौडेलज्यूको आतिथ्यता रहेको थियो ।