महालक्ष्मी नगरपालिका
मिति २०७७/१०/१९ गते नगर प्रमुख श्री रामेश्वर श्रेष्ठज्यूको अध्यक्षतामा “नगर प्रमुख युवा उद्यमशीलता विकास अभिमुखीकरण कार्यक्रम” वडा नं १०, लाँकुरीभञ्ज्याङ स्थित श्री बासुकी मा.वि.मा सम्पन्न भयो। सो कार्यक्रममा नगर उपप्रमुख श्री निर्मला थापाज्यू, वडा नं ८, ९ र १० का वडा अध्यक्षज्यूहरुसहित अन्य जनप्रतिनिधिहरु, प्रमुख प्रशासकीय अधिकृत श्री पुरुषोत्तम सापकोटा, राष्ट्रिय वाणिज्य बैंकका पूर्व कर्मचारी श्री वेद लावती र वडा नं १० बाट नगर प्रमुख युवा उद्यमशीलता विकास कार्यक्रममा आवद्ध हुन इच्छुक ३५ सहभागीहरुको उपस्थिति रहेको थियो । कार्यक्रमको नगर प्रमुखज्यूबाट उद्घाटन भएको थियो।
यस अभिमुखीकरण कार्यक्रममा नगर प्रमुख श्री रामेश्वर श्रेष्ठज्यूले उद्यमशीलताको विकासमा नगरपालिकाको सोच र हाल सम्मको प्रयास सम्बन्धी प्रस्तुतीकरण गर्नुभएको थियो । उहाँले जनप्रतिनिधिको वहालीपछि पूर्वाधार, खानेपानी, शिक्षा, स्वास्थ्य, श्रम तथा रोजगार, वातावरण संरक्षण तथा सरसफाइ, कृषि/पशु विकास जस्ता मुख्य क्षेत्रहरुमा नगरले गरेका प्रयास र उपलब्धीहरुबारे प्रकाश पार्नुका साथै निर्वाचन अघिको प्रतिबद्धता गरेबमोजिम नगर प्रमुख युवा उद्यमशीलता विकास कोषको स्थापना भएको र यसबाट प्रत्यक्ष/अप्रत्यक्ष रुपमा १००० जना रोजगारी सृजना गरिने लक्ष्य रहेको बताउनु भयो । यस कार्यक्रम सञ्चालनका निम्ति तर्जुमा गरिएका कानुनहरु : महालक्ष्मी नगरपालिका उद्यमशीलता विकास कोष सञ्चालन कार्यविधि, २०७७ र महालक्ष्मी नगरपालिका नगर प्रमुख युवा उद्यमशीलता विकास कार्यक्रम सञ्चालन मापदण्ड, २०७७ बारे चर्चा गर्नु भएको थियो।
त्यसै गरी, नगर उपप्रमुख श्री निर्मला थापाज्यूले नगर प्रमुख युवा उद्यमशीलता विकास कार्यक्रम अन्तर्गत सञ्चालन गरिने क्रियाकलापहरु, कार्यक्रममा सहभागीहरुको भूमिका, समूह/उद्यमी छनौटका आधार र कार्यक्रममार्फत उद्यमीले कसरी सहुलियतपूर्ण कर्जा, बजारीकरण र प्रविधि हस्तान्तरणको लाभ लिनसक्छन् भन्ने बारे प्रस्तुतीकरण गर्नु भएको थियो।
आजको कार्यक्रममा प्रमुख प्रशासकीय अधिकृत श्री पुरुषोत्तम सापकोटाले सहभागीहरुलाई कुशल उद्यमी बन्न प्रोत्साहन गर्दै नगर प्रमुख युवा उद्यमशीलता कार्यक्रमबाट कसरी लाभान्वीत हुन सकिन्छ र सो कोषको अवधारणा र प्रयोग बारे थप प्रकाश पार्नुभएको थियो ।
सोही कार्यक्रममा सहुलियतपूर्ण कर्जासम्बन्धी जानकारी र यस कार्यालयका रोजगार संयोजकबाट व्यवसायिक योजना निर्माणबारे सहभागीहरुमाझ छलफल गराइएको थियो ।
(नोटः यस अघि २०७७/१०/०७ गते वडा नं १ को सभाहलमा वडा नं १ देखि ७ सम्मका १९ सहभागिहरुका लागि र २०७७/१०/०८ गते वडा नं ८ को खानेपानी संस्थाको सभाहलमा वडा नं ८ र ९ का ३४ सहभागिहरुका लागि नगर प्रमुख युवा उद्यमशीलता विकास अभिमुखिकरण कार्यक्रम सञ्चालन गरिएको थियो)
